'एव्हेंडस वेल्थ-हुरुन इंडिया युथ सिरीज २०२६' सादर

'यू३५' यादीत देशभरात व्यवसाय उभारणाऱ्या १८० तरुण लीडर्सचा गौरवण्यात आले

मुंबई। आपल्या भागीदारीच्या दुसऱ्या वर्षात पदार्पण करत, एव्हेंडस वेल्थ आणि हुरुन इंडिया यांनी 'एव्हेंडस वेल्थ – हुरुन इंडिया युथ सिरीज २०२६' सादर केली आहे. या मालिकेतील 'यू३५' यादीत देशभरात व्यवसाय उभारणाऱ्या आणि ते यशस्वीपणे पुढे नेणाऱ्या १८० तरुण लीडर्सचा गौरव करण्यात आला आहे. या यादीची ही दुसरी आवृत्ती असून ती गेल्या वर्षीच्या तुलनेत १६% मोठी झाली आहे. २०२५ मध्ये या यादीत १५५ उद्योजक सामील होते, जे देशभरात स्वतःची ओळख निर्माण करणाऱ्या तरुण बिझनेस लीडर्सची वाढती संख्या दर्शवते.

उमंग पपनेजा, एक्झिक्युटिव्ह व्हाईस चेअरमन आणि सीईओ, एव्हेंडस वेल्थ मॅनेजमेंट म्हणाले,"व्यवसायाची दिशा ठरवणारे निर्णय कधीही केवळ त्या व्यवसायापुरते मर्यादित नसतात. उद्योजक भांडवलाचा कसा वापर करतात, वाढीचा मार्ग कसा निवडतात आणि जोखमीचे व्यवस्थापन कसे करतात, याचा थेट परिणाम त्यांच्या गुंतवणुकीवर, कुटुंबांवर आणि त्यांनी निर्माण केलेल्या वारशावर होतो. ही 'यू३५' यादी हे महत्त्वाचे निर्णय घेणाऱ्या तरुण चेहऱ्यांची एक प्रभावी झलक दाखवते, तसेच भारताच्या विकासाचा पुढचा टप्पा घडवण्याचा त्यांचा आत्मविश्वास आणि महत्त्वाकांक्षा यातून स्पष्ट होते. एव्हेंडसमध्ये आम्ही उद्योजकांच्या व्यवसायाच्या प्रत्येक टप्प्यावर त्यांच्यासोबत काम करतो मग ते व्यवसाय वाढवण्यासाठी निधी उभारणे असो, वित्तीय बाजारपेठांपर्यंत पोहोचणे असो, किंवा पिढ्यानपिढ्या संपत्तीचे व्यवस्थापन आणि हस्तांतरण करणे असो. एव्हेंडस वेल्थमध्ये आमचा दृष्टिकोन बहुआयामी आहे, कारण संपत्ती म्हणजे केवळ गुंतवणूक नसून त्यामध्ये व्यावसायिक हितसंबंध, कौटुंबिक प्राधान्यक्रम आणि येणाऱ्या पिढ्यांच्या आकांक्षांचाही समावेश होतो, असे आम्ही मानतो. हे तरुण उद्योजक भारतीय उद्योजकतेचे भविष्य घडवत असल्यामुळे, ही पुढची पिढी निधी, वाढ आणि संपत्ती निर्मितीकडे कोणत्या दृष्टिकोनातून पाहते, हे समजून घेणे अत्यंत महत्त्वाचे ठरेल."

या वर्षी या गटातील उद्योजकांची संख्या १६ टक्क्यांनी वाढून १८० झाली आहे, ज्यांच्या कंपन्यांचे एकूण मूल्यांकन ४८ लाख कोटी रुपये आहे. हे मूल्यांकन गेल्या वर्षीच्या तुलनेत २३% जास्त आहे. या यादीत ७१% पहिल्या पिढीतील उद्योजक आहेत, तर एआय आणि मशीन लर्निंगशी संबंधित फाउंडर्सची संख्या ३ वरून १२ वर पोहोचली आहे, म्हणजेच यात चार पटीने वाढ झाली आहे. हा बदल भारतात मोठ्या प्रमाणावर होत असलेल्या नवीन उद्योगांच्या निर्मितीची साक्ष देतो.

हुरुन इंडियाचे फाउंडर आणि चीफ रिसर्चर अनस रहमान जुनैद म्हणाले,"एव्हेंडस वेल्थ हुरुन इंडिया यू३५ लिस्ट २०२६ देशाच्या अर्थव्यवस्थेतील तरुण उद्योजकांचे मोठे योगदान स्पष्टपणे अधोरेखित करते. या यादीत अशा १८० लीडर्सचा समावेश आहे, ज्यांचे उद्योग ५.८८ लाखांपेक्षा जास्त लोकांना रोजगार देतात आणि यातील ३७ कंपन्यांचे मूल्यांकन १ बिलियन डॉलर्सपेक्षा जास्त आहे. 'यू३०' यादी आपल्याला व्यवसायाची सुरुवात कुठून होते हे सांगते, तर 'यू३५' यादी ते व्यवसाय किती मोठे होऊ शकतात हे दाखवते. आता अर्थव्यवस्थेसाठी पुढची कसोटी ही असेल की, ही वाढ सातत्याने उत्पादकता, नफा आणि कुशल रोजगाराच्या निर्मितीमध्ये बदलते की नाही. हा तरुण गट भारताच्या उज्ज्वल भविष्यासाठी एक अत्यंत मजबूत आणि मोठा पाया तयार करत आहे. भारताचे आर्थिक भविष्य घडवणाऱ्या तरुण उद्योजकांना प्रोत्साहन देण्यासाठी आणि ही भागीदारी अशीच पुढे नेण्यासाठी आम्ही एव्हेंडस वेल्थचे मनापासून आभार मानतो."

या यादीची रचना अनेक रंजक गोष्टी समोर आणते. या गटामध्ये ७१% पहिल्या पिढीतील फाउंडर्स आहेत, तर पुढच्या पिढीतील ५३ लीडर्स पूर्वीपासून सुरू असलेले आपले कौटुंबिक व्यवसाय नव्या रूपाने पुढे नेत आहेत. नवीन उद्योग सुरू होणे आणि कौटुंबिक व्यवसायांमध्ये होणारे बदल, या दोन्हीमुळे भारतात उद्योजकतेचा विस्तार सातत्याने होत आहे. स्पेस, डिफेन्स आणि मॅन्युफॅक्चरिंग यांसारख्या क्षेत्रांसोबतच या यादीत एआय आणि मशीन लर्निंग शी जोडलेल्या उद्योजकांची संख्या चार पटीने वाढली आहे. स्वतःचे तंत्रज्ञान व उत्पादने तयार करणे, परदेशी बाजारपेठेत ओळख निर्माण करणे आणि आपल्या कल्पकतेचा देशाला जास्तीत जास्त फायदा मिळवून देणे, ही तरुण उद्योजकांची मोठी महत्त्वाकांक्षा यातून दिसून येते.