केंद्रीय मंत्री पीयूष गोयल यांच्या हस्ते ‘हंगर फ्री वर्ल्ड’ उपक्रमाचे उद्घाटन

मलाबार ग्रुप केंद्रात प्रशिक्षण घेणाऱ्या विद्यार्थ्यांना दररोज मोफत पौष्टिक जेवण उपलब्ध करून देणार

मुंबई। केंद्रीय वाणिज्य आणि उद्योग मंत्री पीयूष गोयल यांनी मुंबईतील कांदिवली पूर्व येथील अटल बिहारी वाजपेयी कौशल्य विकास केंद्र (ABVKVK) येथे मलाबार ग्रुपच्या ‘हंगर फ्री वर्ल्ड’ उपक्रमाचे उद्घाटन केले. हा उपक्रम युवकांच्या शिक्षण, कौशल्य विकास आणि भविष्यातील रोजगार संधींना बळकटी देण्यासाठी पोषणाच्या महत्त्वपूर्ण भूमिका अधोरेखित करतो. या उपक्रमाअंतर्गत, मलाबार ग्रुप केंद्रात प्रशिक्षण घेणाऱ्या विद्यार्थ्यांना दररोज १०० पौष्टिक जेवण उपलब्ध करून देणार आहे. यामुळे त्यांच्या आरोग्य आणि कल्याणाला आधार मिळेल तसेच ते व्यावसायिक प्रशिक्षण, प्रमाणपत्र अभ्यासक्रम, करिअर विकास आणि भविष्यातील रोजगार संधींवर अधिक चांगल्या प्रकारे लक्ष केंद्रित करू शकतील.

हा उपक्रम मलाबार ग्रुपच्या हंगर फ्री वर्ल्ड कार्यक्रमाचा एक भाग आहे, जो समूहाच्या प्रमुख कॉर्पोरेट सामाजिक उत्तरदायित्व (CSR) उपक्रमांपैकी एक असून, भूक निर्मूलन आणि वंचित समुदायांना पोषणाची उपलब्धता वाढविण्यावर केंद्रित आहे. हंगर फ्री वर्ल्ड सध्या भारतासह विविध आंतरराष्ट्रीय बाजारपेठांमध्ये दररोज एक लाखाहून अधिक जेवणांचे वितरण करते, जे भूक निर्मूलन आणि समाजकल्याणासाठी समूहाची सातत्यपूर्ण बांधिलकी दर्शवते.समूहाने नुकतीच आर्थिक वर्ष २०२६-२७ साठी ₹२०० कोटींच्या CSR निधीची घोषणा केली आहे.

पीयूष गोयल, केंद्रीय वाणिज्य आणि उद्योग मंत्री म्हणाले,"युवकांना सक्षम बनविण्यासाठी आणि त्यांना अर्थपूर्ण रोजगारासाठी तयार करण्यासाठी कौशल्य विकासाची अत्यंत महत्त्वाची भूमिका आहे. पोषणासारख्या मूलभूत गरजांद्वारे विद्यार्थ्यांना आधार देणारे उपक्रम त्यांना शिक्षण आणि वैयक्तिक विकासावर लक्ष केंद्रित करण्यास मोठी मदत करू शकतात. अशा प्रकारचे सहकार्यपूर्ण प्रयत्न युवक विकास आणि रोजगारक्षमता वाढविणाऱ्या सक्षम परिसंस्थेच्या निर्मितीत महत्त्वपूर्ण योगदान देतात."

एम.पी.अहमद, अध्यक्ष, मलाबार ग्रुप म्हणाले,"पोषण आणि शिक्षण यांचा अतिशय जवळचा संबंध आहे. सक्षम शिक्षण व्यवस्थेसाठी दर्जेदार प्रशिक्षणासाठी पुरेशा पोषणाची उपलब्धताही आवश्यक आहे. ‘हंगर फ्री वर्ल्ड’ च्या माध्यमातून आम्ही ही मूलभूत गरज पूर्ण करण्याचा आणि व्यक्तींना आत्मनिर्भरता व आर्थिक सक्षमीकरणाच्या दिशेने त्यांच्या प्रवासात मदत करण्याचा प्रयत्न करत आहोत. अशा प्रकारचे उपक्रम पोषण, कौशल्य विकास आणि सामुदायिक सहकार्य यांच्या माध्यमातून युवकांसाठी अर्थपूर्ण संधी निर्माण करू शकतात आणि दीर्घकालीन सामाजिक विकासाला चालना देऊ शकतात."

श्री पीयूष गोयल यांच्या दूरदृष्टीतून स्थापन करण्यात आलेले अटल बिहारी वाजपेयी कौशल्य विकास केंद्र हे युवकांसाठी एक महत्त्वपूर्ण कौशल्य विकास केंद्र म्हणून कार्यरत आहे. हे केंद्र व्यावसायिक प्रशिक्षण, प्रमाणपत्र अभ्यासक्रम, करिअर मार्गदर्शन आणि रोजगार सहाय्य उपलब्ध करून देत असून युवकांची रोजगारक्षमता वाढविण्यास आणि शाश्वत उपजीविकेच्या संधी निर्माण करण्यास मदत करते.