एमईटीतर्फे एसएफएक्स व प्रोस्थेटिक मेकअप कोर्सची घोषणा

एमईटी इन्स्टिट्यूट ऑफ मास मीडिया आणि क्रिओलानचा उपक्रम 

मुंबई। चित्रपट, दूरचित्रवाणी, ओटीटी प्लॅटफॉर्म्स, रंगभूमी आणि जाहिरात क्षेत्रात विशेष व्यक्तिरेखा रचना आणि वास्तववादी व्हिज्युअल इफेक्ट्सची (एसएफएक्स) वाढती मागणी लक्षात घेऊन, एमईटी इन्स्टिट्यूट ऑफ मास मीडियाने (एमईटी आयएमएम) ने एसएफएक्स व प्रोस्थेटिक मेकअपमधील चार महिन्यांचा सर्वसमावेशक पदविका अभ्यासक्रम अधिकृतपणे सुरू केला आहे. क्रिओलानच्या सहकार्याने कार्यरत असलेल्या 'अकॅडमी ऑफ ब्युटी विथ क्रिएटिव्हिटी – मेकअप स्कूल' यांच्या सहयोगातून विकसित करण्यात आलेला हा अभ्यासक्रम विद्यार्थ्यांना विशेष दृश्यपरिणामांसाठीच्या मेकअपमधील तांत्रिक कौशल्ये आणि कलात्मक बारकावे आत्मसात करण्यासाठी एक विशेष प्रशिक्षणमार्ग उपलब्ध करून देतो.

प्रत्यक्ष स्टुडिओ वातावरणाचा अनुभव देणाऱ्या सत्रांमुळे विद्यार्थ्यांना प्रकाशयोजना, हाय-डेफिनिशन कॅमेरे आणि कथेच्या गरजेनुसार सेटवर प्रोस्थेटिक मेकअप कसा हाताळावा याचे सखोल आकलन होण्यास मदत होईल. हा अभ्यासक्रम विद्यार्थ्यांना उद्योग-सज्ज बनवण्यावर भर देतो, ज्यामध्ये चार महिन्यांच्या कालावधीत विद्यार्थी त्यांच्या प्रत्येक कामाचे दस्तऐवजीकरण करून एक व्यावसायिक पोर्टफोलिओ तयार करतील.

या उपक्रमाविषयी बोलताना एमईटी इन्स्टिट्यूट ऑफ मास मीडियाच्या संचालक डॉ. प्रिया मेनन नायर यांनी सांगितले की, "व्यक्तिरेखेचे रूपांतरण ही एक तांत्रिक अचूकता मागणारी कला आहे. हा डिप्लोमा केवळ तंत्र शिकण्यापुरता मर्यादित नसून, कल्पनेतील पात्रांना जिवंत करण्याचा संपूर्ण प्रवास अनुभवण्याचा उपक्रम आहे. क्रिओलानच्या जागतिक दर्जाच्या कौशल्याची सांगड घालून आम्ही विद्यार्थ्यांना मनोरंजन विश्वात यशस्वी करिअरसाठी सक्षम करत आहोत."

मुंबईत पार पडलेल्या या उद्घाटन सोहळ्यास पंकज भुजबळ (माननीय विश्वस्त, मुंबई एज्युकेशनल ट्रस्ट), श्रीमती विशाखा भुजबळ (वरिष्ठ व्यवस्थापन प्रतिनिधी, एमईटी), डॉ. प्रिया मेनन नायर, डॉ. मुकेश शर्मा (माध्यम शिक्षणतज्ज्ञ आणि विचारवंत), ॲलन जॉन (सीईओ, एबीसी अकॅडमी), अभिनेते आणि चित्रपट निर्माते प्रमोद सांघी तसेच शिक्षणतज्ज्ञ व छायाचित्रकार मनमोहन थोरात उपस्थित होते.

याप्रसंगी क्रिओलानच्या कलाकाराने अभिनेते प्रमोद सांघी यांच्यावर थेट प्रोस्थेटिक मेकअप करून अत्यंत वास्तववादी 'बॅटल सर्व्हायव्हर' लुक साकारला, ज्यामुळे या तंत्रज्ञानाची अचूकता स्पष्ट झाली. ओटीटी आणि व्हिज्युअल स्टोरीटेलिंगच्या या युगात हा अभ्यासक्रम पूर्ण करणाऱ्या विद्यार्थ्यांना प्रॉडक्शन हाऊसेस, जाहिरात एजन्सी आणि क्रिएटिव्ह स्टुडिओमध्ये करिअरच्या मोठ्या संधी उपलब्ध होतील.