महालक्ष्मी सरस २०२६ ला चित्रा वाघ यांची भेट; मुख्यमंत्री देवेंद्र फडणवीस आणि ग्रामविकास मंत्री जयकुमार गोरे यांच्या कार्याचं कौतुक

मुंबई। बीकेसी येथे आयोजित करण्यात आलेल्या महालक्ष्मी सरस २०२६ प्रदर्शनाला महाराष्ट्र विधान परिषदेच्या सदस्या चित्रा वाघ यांनी भेट देत महिला बचत गटांच्या कार्याचं आणि प्रदर्शनाच्या भव्य नियोजनाचं कौतुक केलं. महिलांच्या चेहऱ्यावरचा आनंद, आत्मविश्वास आणि समाधान पाहून अतीव आनंद झाल्याची भावना त्यांनी व्यक्त केली.

राज्याचे मुख्यमंत्री देवेंद्र फडणवीस आणि राज्याचे ग्रामविकास मंत्री जयकुमार गोरे यांच्या माध्यमातून महालक्ष्मी सरस प्रदर्शनाला एक वेगळं आणि भव्य रूप मिळालं असल्याचं चित्रा वाघ यांनी सांगितलं. ग्रामीण भागातील महिलांनी तयार केलेल्या उत्पादनांना मोठी बाजारपेठ उपलब्ध करून देत हे प्रदर्शन आता जागतिक स्तरावर पोहोचण्याच्या दिशेने वाटचाल करत असल्याचेही त्यांनी नमूद केले.

“हा २३ वर्षांचा प्रवास आहे. मी दरवर्षी महालक्ष्मी सरस प्रदर्शनाला भेट देते आणि प्रत्येक वर्षी काहीतरी नवीन अनुभवायला मिळतं. महिलांच्या उत्पादनांमध्ये नाविन्य, आत्मविश्वास आणि व्यवसायिक दृष्टिकोन स्पष्टपणे दिसून येतो,” असे त्या म्हणाल्या.

महिला आणि बालकल्याण विभाग तसेच ग्रामविकास विभागाच्या माध्यमातून हजारो महिलांसाठी उभारण्यात आलेली व्यवस्था अत्यंत कौतुकास्पद असल्याचेही त्यांनी सांगितले. प्रदर्शनात सहभागी झालेल्या महिलांच्या राहण्याची सुविधा, वाहतूक व्यवस्था, उत्पादनांचे मार्केटिंग, पॅकेजिंग आणि व्यवसाय कौशल्य विकसित करण्यासाठी ‘उमेद’ अभियानाच्या माध्यमातून महिलांना प्रभावी प्रशिक्षण दिले जात असल्याचे त्यांनी नमूद केले.

राज्य सरकार महिलांना आर्थिकदृष्ट्या सक्षम बनवण्यासाठी सातत्याने प्रयत्न करत असून राज्यातील प्रत्येक जिल्ह्यात ‘उमेद मॉल’ सुरू करण्याची मुख्यमंत्री देवेंद्र फडणवीस यांची घोषणा महिलांसाठी मोठी संधी ठरणार असल्याचेही चित्रा वाघ म्हणाल्या. महाराष्ट्रातील ग्रामीण भागातील महिला आता आकाशाला गवसणी घालण्यासाठी सज्ज झाल्या असून मुंबईकरांनी या प्रदर्शनाला आवर्जून भेट देत महिलांचा उत्साह वाढवावा, असे आवाहन त्यांनी केले. तसेच चित्रा वाघ यांनी उमेद अभियानाचे मुख्य कार्यकारी अधिकारी  निलेश सागर आणि मुख्य कार्यापालन अधिकारी निखिलकुमार ओसवाल यांचे सुद्धा प्रत्यक्ष भेटून त्यांच्या कार्याचे कौतुक केले.

प्रदर्शनासाठी नागरिकांना मोफत प्रवेश देण्यात आला असून कुर्ला आणि वांद्रे येथून विशेष मोफत बससेवाही सुरू करण्यात आली आहे. त्यामुळे मोठ्या संख्येने मुंबईकर महालक्ष्मी सरस २०२६ प्रदर्शनाला भेट देत आहेत.