पर्नोड रिकार्डकडून वंचित तरुणांना शिक्षण व रोजगाराची मोठी संधी

२५०० हून अधिक विद्यार्थ्यांना ११.६८ कोटी रुपयांची शिष्यवृत्ती 

मुंबई। पर्नोड रिकार्ड इंडिया फाउंडेशन (पीआरआयएफ) ने युथ ड्रीमर्स फाउंडेशनसोबत भागीदारी करून वंचित समुदायातील तरुणांना शिक्षण, कौशल्य विकास आणि अर्थपूर्ण रोजगाराचे मार्ग उपलब्ध करून देत त्यांना सक्षम करण्याचे कार्य अधिक वेगाने पुढे नेले आहे. २०१९ पासून सुरू असलेल्या 'PRIF शिष्यवृत्ती सहाय्य कार्यक्रमांतर्गत महाराष्ट्र, पंजाब आणि राजस्थानमधील २,५७६ विद्यार्थ्यांना यशस्वीपणे सहाय्य करण्यात आले आहे.

या उपक्रमांतर्गत थेट शिष्यवृत्तीच्या माध्यमातून ६.९१ कोटी रुपये वितरित करण्यात आले असून, सरकारी आणि खाजगी शिष्यवृत्ती योजनांद्वारे आणखी ४.७७ कोटी रुपयांचा लाभ मिळवून देण्यात आला आहे. अशा प्रकारे एकूण ११.६८ कोटी रुपयांचे शैक्षणिक सहाय्य उपलब्ध करून देण्यात आले आहे.

केवळ आर्थिक मदत न देता तरुणांना शिक्षणापासून थेट रोजगारापर्यंत पोहोचवणे हा या कार्यक्रमाचा मुख्य उद्देश आहे. यासाठी शिष्यवृत्तीसोबतच मार्गदर्शन, करिअर गाईडन्स आणि रोजगारासाठी आवश्यक प्रशिक्षण दिले जाते.

बदलत्या तंत्रज्ञानानुसार तरुणांना सक्षम करण्यासाठी पीआरआयएफने डिजिटल लर्निंग अँड रिसोर्स सेंटर्स स्थापन केले आहेत. ही केंद्रे स्थानिक पातळीवर डिजिटल प्रवेश, कौशल्य विकास आणि करिअर तयारीसाठी हब म्हणून कार्यरत आहेत. या केंद्रांद्वारे २५० पेक्षा जास्त शिकवणी तास, १०५ सत्रे आणि १८,००० पेक्षा जास्त भेटींची नोंद झाली आहे.

या उपक्रमाबद्दल बोलताना पर्नोड रिकार्ड इंडिया फाउंडेशनच्या प्रवक्त्यांनी सांगितले, "आम्हाची थीम ‘वेगवेगळे संदर्भ, समान आकांक्षा’ ही एका प्रभावी वास्तवाचे दर्शन घडवते. तरुण वेगवेगळ्या पार्श्वभूमीतून आले तरी उज्ज्वल भविष्याची त्यांची आकांक्षा समान असते. पर्नोड रिकार्ड इंडिया फाउंडेशनमध्ये आमचा उद्देश फक्त शिक्षणाचा अधिकार देण्यापुरता मर्यादित नसून, कौशल्यांचा विकास करणारी आणि वंचित तरुणांमधील क्षमता उघड करणारी परिसंस्था निर्माण करणे हा आहे. आजच्या तरुणांमध्ये केलेली ही गुंतवणूक अधिक सक्षम आणि समावेशक भविष्य घडवत आहे."

या उपक्रमाचे सकारात्मक परिणाम आता स्पष्टपणे दिसून येत आहेत. उत्कृष्ट रोजगार निर्मिती करत या कार्यक्रमातून शिकलेले ३६४ विद्यार्थी आज आरोग्यसेवा, तंत्रज्ञान, शिक्षण आणि व्यावसायिक सेवा क्षेत्रातील २७३ नामांकित कंपन्यांमध्ये कार्यरत असून, एकत्रितपणे १० कोटी रुपयांचे वार्षिक उत्पन्न मिळवत आहेत. एका स्वतंत्र सोशल रिटर्न ऑन इन्व्हेस्टमेंट मूल्यांकनानुसार, या उपक्रमात गुंतवलेल्या प्रत्येक १ रुपयावर ३ रुपये इतका मोजता येणारा सामाजिक लाभ झाला आहे. सर्वसमावेशकतेला प्राधान्य देत एकूण लाभार्थ्यांमध्ये ७०% मुली आणि ७०% विद्यार्थी एससी, एसटी, ओबीसी व आर्थिकदृष्ट्या दुर्बल घटकांतील आहेत; यात पहिल्या पिढीतील शिकणाऱ्यांना, एकल पालकांच्या पाल्यांना आणि अनाथ विद्यार्थ्यांना विशेष प्राधान्य दिले गेले आहे. याशिवाय, नाशिकमध्ये माजी विद्यार्थ्यांनी एकत्रितपणे ३ लाख रुपयांचा 'सामुदायिक निधी' उभारून 'पे-इट-फॉरवर्ड' संस्कृती जपली आहे, ज्यातून भविष्यातील गरजू विद्यार्थ्यांना मदत केली जाणार आहे.