भारतातील ॲक्च्युएरिअल क्षेत्राला बळकटी देण्यासाठी आयएआयकडून नवीन उपक्रमांची घोषणा

मुंबई। 'ॲक्च्युअरीज ॲक्ट, २००६' अंतर्गत स्थापन झालेली वैधानिक संस्था 'इन्स्टिट्यूट ऑफ ॲक्च्युअरीज ऑफ इंडिया' (आयएआय) ने 'ॲक्च्युअरीज डे २०२६' चे औचित्य साधून ॲक्च्युएरिअल क्षेत्राला अधिक सक्षम करण्यासाठी आणि विद्यार्थी, व्यावसायिक, उद्योग क्षेत्र, धोरणकर्ते व सर्वसामान्य जनतेमधील सहभाग वाढवण्यासाठी अनेक नवीन उपक्रमांची घोषणा केली.

'कोर्टयार्ड बाय मॅरियट मुंबई इंटरनॅशनल एअरपोर्ट' येथे पार पडलेल्या या कार्यक्रमात केंद्र सरकारच्या वित्त मंत्रालयातील वित्तीय सेवा विभागाचे (डीएफएस) अतिरिक्त सचिव डॉ. देबाशिष पृष्टी मुख्य अतिथी म्हणून उपस्थित होते. याप्रसंगी आयएआयच्या अध्यक्षा प्रीती चंद्रशेखर, उपाध्यक्ष अनुराग रस्तोगी, आयएआयच्या मानद सचिव आशा मुरली, इंटरनॅशनल ॲक्च्युएरिअल असोसिएशन (आयएए) चे अध्यक्ष माईक लोम्बार्डी आणि कार्तिकेय कंडोई (एफआयएआय, एफआयए, एफसीए) हेदेखील उपस्थित होते.

या प्रसंगी बोलताना 'इन्स्टिट्यूट ऑफ ॲक्च्युअरीज ऑफ इंडिया'च्या अध्यक्षा प्रीती चंद्रशेखर म्हणाल्या, "भारत जसा आपल्या सामाजिक सुरक्षा चौकटीचा विस्तार करत आहे आणि दीर्घकालीन आर्थिक व वित्तीय स्थैर्याची उद्दिष्टे साध्य करण्याचा प्रयत्न करत आहे, तसतसे योग्य निर्णय प्रक्रियेसाठी आणि जनविश्वास दृढ करण्यासाठी ॲक्च्युएरिअल तज्ज्ञांचे मार्गदर्शन केंद्रस्थानी येत आहे. ॲक्च्युअरी हे अर्थशास्त्र, वित्त, लोकसंख्याशास्त्र आणि जोखीम व्यवस्थापन (रिस्क मॅनेजमेंट) यांच्या एकत्रित केंद्रावर कार्य करतात. आजची प्रगती ही उद्याची कमजोरी ठरू नये यासाठी आम्ही आजीविकेचे रक्षण करणाऱ्या, संस्थांना मजबूत करणाऱ्या आणि 'विकसित भारत २०४७' च्या दिशेने भारताच्या प्रवासाला गती देणाऱ्या कार्यप्रणालींना आकार देतो. हे खरोखरच अथांग शक्यता आणि अथांग प्रभाव असलेले क्षेत्र आहे."

या सोहळ्याचा एक भाग म्हणून आयएआयने आपल्या 'ब्रांड बायबल'चे अनावरण केले, जे संस्थेची ओळख, संदेश आणि संवादासाठी एक एकीकृत आराखडा तयार करते. ब्रँड बायबलमध्ये अशा तत्त्वांचा आणि मानकांचा समावेश आहे जे IAI सर्व भागधारकांसमोर आणि संवाद माध्यमांवर आपली ओळख सातत्याने व प्रभावीपणे कशी मांडेल, यासाठी मार्गदर्शक ठरतील.

तसेच, आयएआयने आपले विशेष 'जॉब पोर्टल' देखील लाँच केले. हे व्यासपीठ ॲक्च्युएरिअल व्यावसायिक आणि नवीन प्रतिभावंतांना योग्य रोजगार संधींशी जोडण्यासाठी, तसेच नियुक्तीकर्ते आणि ॲक्च्युएरिअल समुदाय यांच्यातील परस्पर संबंध अधिक मजबूत करण्यासाठी डिझाइन केलेले आहे.

याशिवाय, संस्थेने २६ व्या 'ग्लोबल कॉन्फरन्स ऑफ ॲक्च्युअरीज' (जीसीए) आणि 'ॲक्च्युएरिअल ग्लोबल फोरम ऑफ ॲक्च्युअरीज'ची घोषणा केली. ही परिषद या क्षेत्राला आणि व्यापक आर्थिक जाळ्याला आकार देणाऱ्या नवीन प्रवृत्ती, जोखीम आणि संधींवर चर्चा करण्यासाठी जगभरातील ॲक्च्युएरिअल व्यावसायिक, धोरणकर्ते, उद्योग क्षेत्रातील दिग्गज आणि जागतिक तज्ज्ञांना एकाच व्यासपीठावर आणेल.

हे सर्व उपक्रम भारतातील बदलत्या वित्तीय आणि आर्थिक पटलावर विमा, पेन्शन, गुंतवणूक, जोखीम व्यवस्थापन आणि इतर क्षेत्रांमध्ये ॲक्च्युएरिअल क्षेत्राचे स्थान अधिक मजबूत करण्यासाठी आयएआयच्या निरंतर प्रयत्नांना दर्शवतात.