मुंबई। वर्ल्ड रोबोट ओलंपियाड(डब्ल्यूआरओ) इंडिया मुंबई प्रादेशिक स्पर्धा २०२६ मध्ये युवा अभियंत्यांची प्रतिभा, त्यांची कल्पकता आणि नवनवीन तंत्रज्ञान यांचा सुंदर संगम पाहायला मिळाला. या स्पर्धेत विविध भागांतील विद्यार्थ्यांनी यावर्षीच्या जागतिक थीम रोबोट्स मीट कल्चर” वर आधारित आधुनिक रोबोटिक्स प्रकल्प सादर केले. अभिनेते रितेश देशमुख आणि अभिनेत्री जेनेलिया देशमुख यांनी फ्युचर इनोव्हेटर्स एलिमेंटरी या श्रेणीत सहभागी झालेल्या विद्यार्थ्यांना आणि आपल्या मुलांना प्रोत्साहन दिले. या दोघांनी विद्यार्थ्यांशी संवाद साधला तसेच त्यांनी तयार केलेले रोबोटिक्स प्रकल्प पाहिले. विद्यार्थ्यांची तंत्रज्ञानाबद्दलची आवड, सर्जनशील विचार आणि समस्या सोडवण्याची क्षमता पाहून त्यांनी त्यांचे कौतुक केले. रितेश आणि जेनेलिया देशमुख यांच्या उपस्थितीमुळे विद्यार्थी, पालक, मार्गदर्शक आणि उपस्थितांमध्ये उत्साहाचे वातावरण निर्माण झाले.
इंडिया STEM फाउंडेशन (ISF) आणि नॅशनल कौन्सिल ऑफ सायन्स म्युझियम्स (NCSM) यांच्या संयुक्त विद्यमाने, भारत सरकारच्या संस्कृती मंत्रालयाच्या सहकार्याने ही स्पर्धा आयोजित करण्यात आली होती. या स्पर्धेत फ्युचर इनोव्हेटर्स एलिमेंटरी’ आणि सिनियर’ या श्रेणीतील विद्यार्थ्यांनी तज्ज्ञ परीक्षकांसमोर आपले नाविन्यपूर्ण प्रकल्प सादर केले. विविध टप्प्यांतील मूल्यांकनातून विद्यार्थ्यांनी आपल्या कल्पना आणि तांत्रिक कौशल्याचे प्रदर्शन केले. विद्यार्थ्यांनी सादर केलेल्या या प्रकल्पांमधून रोबोटिक्स आणि तंत्रज्ञानाच्या मदतीने सांस्कृतिक वारसा कसा जतन करता येतो, त्याचे चांगल्या पद्धतीने सादरीकरण कसे करता येते आणि त्याला नवीन स्वरूप कसे देता येते, हे दाखवण्यात आले. तसेच सर्जनशील विचार आणि अभियांत्रिकी कौशल्यांच्या माध्यमातून दैनंदिन जीवनातील समस्यांवर उपाय शोधण्याची क्षमता देखील या प्रकल्पांमधून दिसून आली.
मुंबई प्रादेशिक चॅम्पियनशिप ही फ्युचर इनोव्हेटर्स श्रेणीसाठी भारतभर आयोजित करण्यात येणाऱ्या दहा प्रादेशिक स्पर्धांपैकी एक आहे. या प्रादेशिक फेरीत निवड झालेल्या संघांना २६ ते २८ ऑगस्ट २०२६ दरम्यान जीएमआर एरिना, जीएमआर एअरोसिटी, हैदराबाद येथे होणाऱ्या वर्ल्ड रोबोट ओलंपियाड(डब्ल्यूआरओ) इंडिया राष्ट्रीय चॅम्पियनशिप २०२६ मध्ये सहभागी होण्याची संधी मिळणार आहे.
टिप्पणियाँ
एक टिप्पणी भेजें