मुंबई: पर्नोड रिकार्ड इंडियाने आर्थिक वर्ष २०२५ मध्ये २७,४४५.८० कोटी रुपयांच्या एकत्रित विक्रीसह मूल्याच्या दृष्टीने देशातील सर्वात मोठी मद्यनिर्माता कंपनी म्हणून आपले स्थान कायम राखले आहे. या बाबतीत तिने डियाजिओ इंडिया (युनायटेड स्पिरिट्स लिमिटेड)ला मागे टाकले आहे.
बिझनेस इंटेलिजन्स प्लॅटफॉर्म टोफलरकडून मिळालेल्या आर्थिक आकडेवारीनुसार,आर्थिक वर्ष २०२५ मध्ये पर्नोड रिकार्ड इंडियाची एकूण उलाढाल २७,६६३.५६ कोटी रुपये इतकी होती जी वर्षभराच्या तुलनेत २.७ टक्क्यांची वाढ दर्शवते.
ब्रिटिश बहुराष्ट्रीय मद्यनिर्माता कंपनी डियाजिओ आणि फ्रेंच वाईन व स्पिरिट्स कंपनी पर्नोड रिकार्ड यांच्या भारतीय उपकंपन्यांची एकत्रित उलाढाल ५५,२७५.६ कोटींवर पोहोचली आहे. त्यानंतर बिअर उत्पादक युनायटेड ब्रुअरीज लिमिटेडचा क्रमांक लागतो, जी सध्या डच बहुराष्ट्रीय ब्रूइंग कंपनी हाइनकेनच्या मालकीची आहे. आर्थिक वर्ष २०२४-२५ मध्ये यूबीएलची एकत्रित उलाढाल १९,४४४.४४ कोटी रुपये इतकी होती.
एब्सोल्यूट, शिवास रीगल आणि ग्लेनलिव्हेट यांसारखे लोकप्रिय ब्रँड्स असलेली पर्नोड रिकार्ड इंडिया ही पर्नोड रिकार्ड साउथ एशियाची पूर्ण मालकीची उपकंपनी आहे. याशिवाय, पर्नोड रिकार्ड इंडियाकडे सीग्राम पोर्टफोलिओही आहे, ज्यामध्ये ब्लेंडर्स प्राइड, १०० पाइपर्स, लॉन्गिट्यूड ७७ आणि नव्याने लाँच केलेला एक्सक्लमेशन ब्रँड समाविष्ट आहे.
कंपनीने मागील वर्षी आपला इम्पीरियल ब्लू पोर्टफोलिओ देशांतर्गत कंपनी तिलकनगर इंडस्ट्रीजकडे हस्तांतरित केला होता. आर्थिक वर्ष २०२५ मध्ये पर्नोड रिकार्ड इंडियाचा नफा १,७३४.५९ कोटी रुपये इतका राहिला जो ८ टक्क्यांची वाढ दर्शवतो. मागील वर्षी हा नफा १,६०५.९९ कोटी रुपये होता.
आर्थिक वर्ष २०२५ मध्ये ‘जाहिरात व प्रचार खर्च’ ८६४.१६ कोटी रुपये इतका होता, जो आर्थिक वर्ष २०२५ मधील ८४५.१५ कोटी रुपयांच्या तुलनेत २.२५ टक्क्यांनी अधिक आहे. तसेच, आर्थिक वर्ष २०२५ मध्ये कंपनीचा एकूण करखर्च ६०७.६५ कोटी रुपये इतका राहिला, जो ७.८५ टक्क्यांची वाढ दर्शवतो.
आर्थिक वर्ष २०२५ मध्ये पर्नोड रिकार्ड इंडियाचा एकूण खर्च २.२३ टक्क्यांनी वाढून २५,३२१.३३ कोटी रुपये झाला. देशांतर्गत विक्रीतून कंपनीला २७,०९९.३८ कोटी रुपयांचे उत्पन्न मिळाले, तर निर्यातीतून २७४.८६ कोटी रूपांची कमाई झाली.
गेल्या महिन्यात पर्नोड रिकार्ड इंडियाचे सीईओ जाँन टुबूल यांनी सांगितले होते की, प्रीमियमायझेशन, इनोव्हेशन आणि उच्च श्रेणीतील सहभाग या घटकांच्या बळावर कंपनी भारतात ‘डबल-डिजिट’ वाढ साध्य करण्याची आकांक्षा बाळगते.
टिप्पणियाँ
एक टिप्पणी भेजें