मुंबई। महिंद्रा समूहाने सुरु केलेला आणि टीमवर्क आर्ट्सद्वारे निर्मित महिंद्रा एक्सलन्स इन थिएटर अवॉर्ड्स (मेटा) चा २१ वा सोहळा १९ ते २५ मार्च २०२६ दरम्यान नवी दिल्ली येथे आयोजित करण्यात आला आहे. या महोत्सवात देशभरातील काही अतिशय उत्कृष्ट नाट्यकृती एकत्र सादर केल्या जातील.
भारतीय रंगभूमी आणि चित्रपटसृष्टीतील असाधारण योगदानाबद्दल यावर्षी अमोल पालेकर यांना ‘मेटा जीवनगौरव पुरस्कार’ दिला जाणार आहे. अनेक दशकांच्या कारकिर्दीत त्यांनी रंगभूमीला पर्यायी जागांपर्यंत नेऊन नवे प्रयोग केले आणि १९७० च्या दशकात ‘सामान्य माणसाची’ प्रतिमा साकारत हिंदी चित्रपटसृष्टीत वेगळी ओळख निर्माण केली. पुढे त्यांनी सामाजिक विषय हाताळणारे दिग्दर्शक म्हणूनही ठसा उमटवला.
२०२६ च्या या पर्वासाठी मेटाकडे विक्रमी संख्येने तब्बल ४२२ प्रवेशिका आल्या आहेत. मेटाच्या इतिहासातील ही आतापर्यंतची सर्वोच्च संख्या आहे. यामध्ये २० हून अधिक भारतीय राज्ये, १०० हून अधिक शहरे आणि ६० भाषा व बोलीभाषांमधील कलाकृतींचा समावेश आहे. मेटा सेक्रेटरिएटने यामधून १० सर्वोत्कृष्ट कलाकृतींची निवड केली आहे. आठवडाभर चालणार असलेल्या या महोत्सवात १३ स्पर्धात्मक श्रेणींमध्ये या १० कलाकृती सादर केल्या जातील.
निवडलेल्या नाटकांचे प्रयोग कमानी ऑडिटोरियम आणि श्री राम सेंटर फॉर परफॉर्मिंग आर्ट्स येथे दररोज दोन सत्रांत होतील. महोत्सवाची सांगता २५ मार्च २०२६ रोजी कमानी ऑडिटोरियममध्ये होणाऱ्या ‘मेटा अवॉर्ड्स नाईट’ ने होईल. यावर्षीची नाटके पौराणिक कथा, लिंगभाव, ओळख, राजकारण आणि सामाजिक परिवर्तन यांसारख्या विषयांवर आधारित असून ती भारतातील विविध राज्ये व भाषांचे प्रतिनिधित्व करतात.
२०२६ च्या 'मेटा' परीक्षकांमध्ये ख्यातनाम नाट्यदिग्दर्शिका अमल अल्लाना; नाट्यदिग्दर्शिका आणि शिक्षणतज्ञ अनुराधा कपूर; गाजलेले रंगभूमी आणि चित्रपट अभिनेते रजित कपूर; सुप्रसिद्ध नाटककार, दिग्दर्शक आणि अभिनेते सतीश आळेकर; आणि ज्येष्ठ अभिनेत्री, गायिका आणि नाट्यकर्मी इला अरुण यांसारख्या भारतीय रंगभूमीवरील काही अतिशय प्रतिष्ठित व्यक्तींचा समावेश आहे:
देशभरातून आलेल्या प्रवेशिकांचे परीक्षण करून दीपा गेहलोत, जिनो जोसेफ, केवल अरोरा, प्रा. सत्यव्रत राऊत आणि स्वरूपा घोष यांच्या प्रतिष्ठित समितीने निवड प्रक्रिया पूर्ण केली.
महिंद्रा समूहाचे कल्चरल आउटरिच विभागाचे उपाध्यक्ष आणि प्रमुख जय शाह म्हणाले की, ‘मेटा’ हा कल्पकता आणि रंगभूमीच्या शक्तीचा उत्सव असून यावर्षीच्या विक्रमी प्रवेशिका समकालीन भारतीय रंगभूमीतील वैविध्य आणि चैतन्य दर्शवतात. हे व्यासपीठ कलाकारांना पाठबळ देत प्रेक्षकांना संवाद आणि विचारांना प्रवृत्त करणाऱ्या कथा अनुभवण्याची संधी देते.
टीमवर्क आर्ट्सचे व्यवस्थापकीय संचालक संजॉय के. रॉय म्हणाले की, ‘मेटा’ दरवर्षी भारतभरातील कथा आणि नाट्यपरंपरा एकत्र आणतो. २०२६ साठी निवडलेल्या १० कलाकृती कल्पकता आणि प्रयोगशीलतेचे उत्कृष्ट उदाहरण असून त्या दिल्लीतील प्रेक्षकांसाठी सांस्कृतिक वैविध्याचा उत्सव ठरतील.
महिंद्रा एक्सलन्स इन थिएटर अवॉर्ड्सचे (मेटा) फेस्टिवल प्रोड्युसर सूरज ढींगरा म्हणाले की, ‘मेटा’ दरवर्षी प्रेक्षकांना भारतीय रंगभूमीचे वैविध्य आणि व्यापकता एका शहरात अनुभवण्याची संधी देतो. यावर्षी निवडलेली नाटके देशभरातील कथाकथनाच्या शैली आणि नाट्यपरंपरांची समृद्ध झलक सादर करतात.
‘मेटा’ २००६ मध्ये सुरू झाले असून आज ते भारतीय रंगभूमीवरील तंत्र, कौशल्य आणि नाविन्याचा गौरव करणारे एक प्रतिष्ठित व्यासपीठ मानले जाते, जे विविध भाषा व संस्कृतीतील कलाकारांना संधी देते.
२१ व्या ‘मेटा’मध्ये जीवनगौरव पुरस्कारासह एकूण १४ श्रेणींमध्ये पुरस्कार दिले जाणार असून त्यात सर्वोत्तम निर्मिती, दिग्दर्शक, नेपथ्य, प्रकाश, ध्वनी-संगीत, वेशभूषा, अभिनेता-अभिनेत्री, सहाय्यक भूमिका, मूळ संहिता, एन्सेंबल आणि नृत्यदिग्दर्शक अशा श्रेणींचा समावेश आहे.
टिप्पणियाँ
एक टिप्पणी भेजें